Заглавная страница Акта о каноническом общении. Из ежегодника «Предстоятель»
Молитва первая, пред подписанием Акта и служением Божественной литургии
Владыко Господи Иисусе Христе Боже наш, обещавый, яко врата адова не одолеют Церковь Твою, воззри убо на Церковь Русскую, в годину лютую скорби великия претерпевшую и сонмы мученик пред лицем Твоим явившую; и предстательством Пречистыя Твоея Матере, святаго равноапостольнаго великаго князя Владимира, святителей Московских Петра, Алексия, Ионы, Макария, Филиппа, Иова, Ермогена и Тихона, святых Царственных страстотерпцев и всех новомучеников и исповедников Российских соблюди ю невредиму и необориму и мирну.
Иже ко Отцу Небесному о ученицех Твоих молитву вознесый, да вси едини будут, призри милостивым оком на люди Твоя согрешившия и не соблюдшия воли Твоея, благослови благое намерение наше и дело единения Церкве к славе Твоей Сам соверши, утоли церковныя соблазны и разделения.
Давый нам заповедь Твою, еже любити Тебе, Бога нашего, и ближняго своего, сотвори, да от всех обид и нестроений избавимся, братолюбие же да царствует среди чад Церкве нашея, во Отечестве и разсеянии сущих.
Сподоби убо нас ныне внити во святая Твоя и принести Ти жертву безкровную, во еже соединенным быти во едино тело причастием Животворящаго Тела и Честныя Крови Твоея и славословити всем сердцем Твое неизреченное человеколюбие.
Благослови ны, Господи, благословением Твоим небесным, да оным осеняеми, в мире и единении поживем и тако обителей райских достигнем, идеже есть совершение веры, исполнение надежды и истинная любовь; и тамо с лики святых Твоих прославим Тебе, Господа и Пастыреначальника нашего, со Безначальным Твоим Отцем и Божественным Духом во веки веков. Аминь.
***
Молитва вторая, благодарственная по Божественной литургии
Господи Иисусе Христе Боже наш, благодатию Святаго Духа средостения разделений упразднивый и сподобивый нас пречестное и великолепое имя Твое единеми усты и единем сердцем возславити и купно Святых Твоих Таин причаститися; приими сию жертву словесную и благодарение наше, еже Тебе по силе приносим о Твоих благодеяниях, на Церкви Русской и народе нашем ныне явленных.
Твое обетование приемлюще, яко со ученики во вся дни до скончания века пребудеши, и никтоже ны от Твоея любве разлучити возможет, Тебе Благаго Примирителя нашего молим: утверди в нас страх Твой и друг ко другу любовь нелицемерну, да разумеют человецы яко ученицы есмы имуще любы между собою.
Церковь Русскую избави от всякаго злаго обстояния, мир и тишину нам даруя.
Яко Бог милости и щедрот и человеколюбия еси, и Тебе славу возсылаем со Отцем и Святым Твоим Духом, ныне и присно и во веки веков. Аминь.